DAMULOG, BUKIDNON — Kasamtangang nagpaalim sa magkalahing tambalanan ang duha ka lalaki human kini nagtinigbasay gumikan sa ilang mainitong lalis samtang ubos sa impluwensya sa ilimnong makahubog didto sa Barangay Macapari, Damulog, Bukidnon niadtong Domingo sa gabii, Hulyo 19.
Sa inisyal nga imbestigasyon sa Damulog Municipal Police Station, giila ang mga nalambigit nga usa ka 56-anyos nga lalaki kinsa nakaangkon og samad tinigbasan sa iyang wala nga bukton, ug usa ka 40-anyos nga lalaki nga nasamad usab ang agtang. Ang 56-anyos dinalian nga gidala sa Bukidnon Provincial Hospital (BPH) sa lungsod sa Kibawe, samtang ang kaatbang niini gidala usab sa laing labing duol nga ospital.
Nasayran nga nakadawat og tawag ang mga otoridad gikan sa hepe sa Barangay Peacekeeping Action Team (BPAT) hinungdan nga dinalian silang miresponde sa dapit diin narekober ang usa ka mahait nga hinagiban nga gigamit sa maong tinigbasay.
Kini nga insidente gilayon nga gitaho ni Bukidnon PPO Director Police Colonel Oliver Sotto Navales ngadto kang Regional Director Police Brigadier General Christopher Nortez Abrahano, diin nigawas sa imbestigasyon nga personal nga interes o intent to gain ang motibo sa maong kagubot. Sa pagkakaron, padayon pa ang gihimong follow-up investigation sa kapulisan alang sa pagpasaka og saktong kaso batok sa duha ka suspetsado sa higayon nga makagawas na sila sa tambalanan.