Labing menos unom ka tawo ang namatay samtang 21 ang nangaangol human maigo sa magkasunod nga kusog nga lindol ang bulubunduking bahin sa nasod sa Peru.
Sumala sa National Seismological Center sa Peru, mitaak ang duha ka sunod-sunod nga pagtay-og nga adunay magnitude 5.1 ug 3.7 sa probinsya sa Chupaca, rehiyon sa JunÃn, nga anaa sa 300 kilometros ang kalay-on sa sidlakan gikan sa kaulohan nga Lima.
Gibutyag ni Luis Vásquez, ang pangulo sa National Civil Defense Institute sa nasod, nga banabanaang 48 ka mga balay ang hingpit nga nangaguba ug 18 ang nangadaot. Tungod kay kasagaran sa mga balay sa maong komunidad ginama man sa adobe kon tisa, dali ra kini nga nahugno tungod sa kakusog sa pag-uyog sa yuta.
Sa pagkakaron, anaa sa 300 ka mga residente ang nawad-an og puy-anan ug temporaryong gipahimutang una sa mga tent nga daling gipang-apod-apod sa mga otoridad. Padayon pa usab ang operasyon sa mga bombero ug rescue teams sa pagpanglimpyo sa mga nangatumpag nga debris taliwala sa kabalaka nga duna pa’y laing mga biktima nga natabunan sa ilawom niini.