Malampusong nasikop sa hiniusang pwersa sa kapulisan ang duha ka gikonsiderang high-profile ug “most wanted persons” sa Bukidnon sa managlahing operasyon niadtong Miyerkules, Hulyo 15, 2026.
Unang nasikop sa Barangay 2, Malaybalay City si Julito Abne alyas “Julito Abni Marcelino,” 27 anyos. Si Abne giilang Top 2 most wanted sa probinsya ug dakbayan tungod sa kasong Murder ug Attempted Murder nga walay girekomendang pyansa.
Samtang, nasikop usab sa Barangay Laligan, Valencia City si Erwin Sobretodo, 33 anyos, kinsa maoy Top 8 most wanted sa tibuok Bukidnon. Siya nag-atubang og kasong Qualified Rape of a Minor ug Lascivious Conduct nga wala sab gihapoy pyansa.
Ang duha ka dinakpan kasamtangan nang nagtingkagol sa selda sa Malaybalay ug Valencia City Police Station alang sa saktong disposisyon sa ilang mga kaso.