Gilauman ni Impeachment Court Presiding Officer ug Senador Francis Escudero nga maresolba na sa Korte Suprema ang isyu sa gidaghanon sa boto nga gikinahanglan aron makahatag og hukom sa usa ka respondent sa impeachment trial, sa dili pa magpagawas og pinal nga desisyon ang Senado sa kaso ni Bise Presidente Sara Duterte.
Matud ni Escudero, ang kasamtangang basihan sa impeachment court nagpabiling 16 ka boto o two-thirds sa kinatibuk-ang 24 ka miyembro sa Senado, subay sa Konstitusyon ug sa naglungtad nga desisyon sa Korte Suprema sa kasong Bayan v. Zamora.
Samtang, sumala ni Senador Panfilo Lacson, nga mas maayong masulbad ang maong isyu sa daling panahon aron malikayan ang posibleng legal nga mga isyu sa ulahi bahin.
Gipasabot usab ni Escudero nga bisan pa og 21 lamang ang aktibong mga senador sa pagkakaron tungod kay anaa sa kustodiya sila Senador Jinggoy Estrada ug Senador Rodante Marcoleta, samtang wala pa gihapon makita si Senador Ronald “Bato” dela Rosa, ang basihan gihapon sa two-thirds vote mao ang kinatibuk-ang 24 ka pwesto sa Senado.
Gipunting usab ni Escudero nga wala siyay nadawat nga kasabutan gikan sa ubang mga senador bahin sa maong isyu, kondili iyang gipadayag lamang ang iyang legal nga interpretasyon base sa kasamtangang balaod.
Dugang pa niya, mas maayong maresolba na kini sa Korte Suprema kon adunay mosang-at og petisyon samtang nagpadayon pa ang impeachment trial aron malikayan ang dugang nga panaglalis sa higayon nga makapagawas na og desisyon ang impeachment court.