Opisyal nang gikasal ang sikat nga aktres nga si Bea Alonzo ug ang iyang negosyanteng pamanhonon nga si Puregold Price Club Inc. President Vincent Co pinaagi sa usa ka hilom ug pribadong civil wedding niadtong Lunes sa gabii, Hulyo 13, sa Makati City Hall.
Mismo si Makati Mayor Nancy Binay ang nanguna sa pagkasal sa duruha, diin misamot pa ang kadasig sa mga netizen human nag-post ang mayora og hulagway kauban ang aktres nga adunay caption nga “Coffee w/ coffeemate” ug hashtag nga #OneMoreChance. Sumala sa showbiz columnist nga si Ogie Diaz, kinsa nakakita sa Certificate of Marriage, hilabihan ka simple ang seremonyas diin unom lang ka tawo ang mitambong ug wala gani’y bisan usa ka kabanay o sakop sa pamilya sa magtiayon. Ang nahimong mga saksi mao ra ang mga tag-iya sa Secosana bags nga kasosyo ni Bea sa negosyo.
Kahinumduman nga naging kontrobersyal ang relasyon sa duha human nanggawas ang mga report nga giingong nakansela ang giplano untang engrandeng kasal sa magtiayon didto sa nasod sa Spain gumikan sa giingong panagbangi sa prenuptial agreement. Sa pagkakaron, nagpabilin pa nga takom ang kampo nilang Bea ug Vincent ug wala pa’y gipagawas nga pormal nga pamahayag o opisyal nga hulagway kalabot sa ilang pagpakasal.