Nahimong sentro sa impeachment trial ang “Romanov” nga pamahayag ni Davao City Mayor Sebastian “Baste” Duterte human giingon ni Senator-judge Raffy Tulfo nga si Mayor Duterte ang unang naghisgot niini atol sa usa ka rally.
Gikumpirma usab ni NBI-BARMM Regional Director Jeremy Lotoc nga sa ilang imbestigasyon, ang video ni Mayor Duterte maoy unang ilang nakit-an nga naghisgot sa “Romanov.” Matud ni Lotoc, ang iyang nahinumdoman nga gisulti ni Mayor Duterte mao ang, “Mr. President, remember what happened to the Romanovs. When you go to bed tonight, think about the Romanovs.”
Iyang giingon nga ang maong pahayag gisabot sa NBI nga nagpasidaan sa posibilidad nga mahitabo sa pamilya sa Presidente ang susamang nahitabo sa pamilyang Romanov.
Gipasabot usab ni Lotoc nga giseryoso sa NBI ang impormasyong may kalabotan sa giingong “Operation Romanov,” maong nagpahigayon sila og imbestigasyon aron susihon ang maong mga pahayag. Samtang, gipanalipdan ni Senator-judge Alan Peter Cayetano ang pahayag ni Mayor Duterte.
Matod niya, dili angay dayong hukman nga gihulga niini ang First Family ug kinahanglan patas ang pagtan-aw sa isyu alang sa pamilyang Marcos ug sa pamilyang Duterte.
Dugang pa niya, posible nga lahi ang gipasabot sa “Romanov” nga gihisgutan ni Mayor Duterte kumpara sa giingong “Operation Romanov” nga nalambigit sa pamilya ni Vice President Sara Duterte.
Sa laing bahin, giingon sa depensa nga usa ka vlogger nga si Princess Maui ang nangutana kang Vice President Sara Duterte bahin sa “Operation Romanov,” ug wala sila mahibalo sa pahayag ni Mayor Sebastian Duterte nga may kalabotan sa “Romanov.”