Napulo na ang namatay sa landslide nga nahitabo sa Sitio Pandao, Barangay Poblacion, Malapatan, Sarangani Province.
Walo sa mga namatay ang gidala pinaagi sa helicopter ngadto sa town proper, samtang ang usa ka patay’ng lawas nga unang nadala niadtong miaging adlaw gihaya na. Padayon usab ang pagpangita sa mga rescuers sa lawas sa usa pa ka bata nga gituohang nalubong sa natumpag nga yuta.
Dako ang kasubo nga gibati sa mga kabanay sa napulo ka biktima nga nakabsan sa kinabuhi tungod sa maong landslide.
Sumala sa incident commander, misulay matud pa og bakwit ang duha ka pamilya gikan sa ilang puloy-anan sa kabukiran tungod sa hulga sa dili maayong panahon, apan natabonan sila sa nahugno nga yuta.
Ang pagbaha ug landslide giingong resulta sa padayon nga kusog nga ulan nga dala sa habagat, nga maoy dugang hagit sa mga komunidad nga naapektuhan na sa miaging linog.