Nakabsan sa kinabuhi ang usa ka 54-anyos nga lalaki human mabanggaan sa usa ka Nissan Navara pick-up samtang motabok unta sa karsada sa Quezon, Bukidnon niadtong Hulyo 12, 2026, mga alas 7:48 sa gabii.
Base sa inisyal nga imbestigasyon, kalit lang kunong mitabok ang biktima sa dalan.
Gituohang ubos kini sa impluwensya sa ilimnong makahubog sa dihang naigo sa pick-up nga gimaneho sa usa ka 38-anyos nga lalaki nga nagbiyahe gikan sa Kibawe padulong sa Davao City.
Tungod sa kusog sa bangga, nakaangkon ang biktima og grabeng mga samad. Gidali pa kini og dala sa Quezon Health Center Infirmary apan gideklarang dead on arrival sa attending physician.
Samtang, ang drayber ug ang Nissan Navara nga adunay plaka nga LAD 4797 anaa karon sa kustodiya sa Quezon Municipal Police Station samtang nagpadayon ang imbestigasyon aron matino ang tanang kahimtang sa nahitabong aksidente.