Gibana-banang kapin sa 10,000 ka mga indibidwal ang White Ribbon March sa EDSA kansa gisugdan sa usa ka misa sa EDSA Shrine ug nagmartsa na padulong sa People Power Monument samtang halos 9,600 ka mga pulis usab ang gi-deploy aron masiguro ang kaluwasan sa tanan.
Ang misa sa EDSA Shrine, gipangunahan ni Kidapawan Bishop Jose Bagaforo samtang ang mga partisipante nagsul-ob og puti nga sinina ug nagbitbit og white ribbons isip simbolo sa anti-corruption advocacy.
Sa homiliya ni Bagaforo, gibutyag niini nga ang pagka-self-centered maoy usa sa mga gamot sa korapsyon, ug ang tinuod nga naghigugma sa isigkatawo dili mangawat ug manglimbong.
Gisalmutan usab kini sa mga religious leaders, civil society groups, ug mga kanhi magbabalaud sama nila Liza Maza, France Castro, Satur Ocampo, ug Teddy Casiño.
Singgit sa mga dili iladong misalmot nga panahon na aron sumpuon ang kurapsyon ug patubagon ang mga nalambigit niini dungan sa panawagan nga hunungon na ang away sa pulitika tungod kay ang yanong katawhan ang apektado niini.
Mitambong usab sa White Ribbon March si Atty. Maria Kristina Konti.
Matud ni Konti, ang pakigbatok sa korapsyon mao ang nag-unang rason sa iyang pag-apil sa maong martsa.
Gipadayag usab niini ang iyang kalipay sa maisugong baruganan sa mga partisipante nga isulong ang matinud-anon ug maayong pangagamhanan.