Usa ka monghe sa India nga nailhan nga si Daulat Giri Ji Maharaj ang nagpadayon sa iyang talagsaong panumpa nga dili molingkod o mopahigda sulod sa 12 ka tuig isip bahin sa iyang espiritwal nga debosyon.
Sulod na sa lima ka tuig, nagpabilin siyang nagbarog isip miyembro sa Khareshwari sect, usa ka grupo sa mga ascetic monk nga mas nailhan usab nga “Standing Babas.”
Alang kanila, ang padayon nga pagtindog usa ka matang sa sakripisyo ug pagdisiplina sa kaugalingon aron mas mapalalom ang ilang pagtuo ug pag-alagad kang Shiva.
Aron makatabang sa ilang adlaw-adlaw nga panginahanglan, naggamit sila og mga suporta sama sa lubid, duyan ug espesyal nga harness aron makapahulay bisan wala molingkod o mihigda.
Sa mga hulagway ug bidyo nga mikaylap online, makita ang paghubag ug pag-itom sa mga bitiis ni Maharaj tungod sa dugay nga pagtindog.
Bisan pa niini, nagpadayon gihapon siya sa iyang panumpa uban sa tabang sa mga boluntaryo sa templo nga nagaatiman sa iyang kahimsog ug nagapahid og mga tambal sa iyang mga bitiis.
Samtang, nagpasidaan ang mga eksperto sa panglawas nga ang sobrang kadugayon nga pagtindog mahimong mosangpot sa mga problema sa sirkulasyon sa dugo, paghubag sa mga bitiis, ug uban pang seryosong komplikasyon sa lawas.