Gianunsyo sa Senate Committee on Agriculture nga pagaimbestigahan ang gikatahong overimportation sa sibuyas ug uban pang produktong agrikultural taliwala sa mga kabalaka nga makaapekto kini sa pangabuhian sa mga lokal nga mag-uuma.
Sumala ni Sen. Francis “Kiko” Pangilinan, ang chairman sa komite, hisgutan sa mosunod nga pagdungog ang pagsulod sa hilabihan ka daghang imported nga produkto ug ang mga taho nga giingong gihikawan ang mga lokal nga mag-uuma ug mangingisda sa paggamit sa mga cold storage facility.
Kini nga lakang gihimo human sa gipahigayong inspeksyon sa 26 ka container van sa Manila International Container Port nga nagkarga og mga imported nga pulang sibuyas nga may gibug-aton nga 650,000 ka kilo.
Gumikan niini, gipangutana ni Pangilinan kung gikinahanglan ba gyud ang maong gidaghanon ug kung matawag ba kini nga overimportation bisan pa man nga aduna silay gihawakang mga legal nga permit.
Gawas sa mga gihatagan og import permit, ipapatawag usab sa pagdungog ang mga operator sa cold storage facility aron patubagon sa alegasyon nga gigapos o gireserba sa mga adunahang trader ang mga pasilidad nga alang unta sa mga lokal nga prodyuser.