Gisuspinde ni Senator Erwin Tulfo ang consultative meeting sa Senate Blue Ribbon panel kalabot sa imbestigasyon sa flood control projects human sa pag-igo sa Mindanao sa 7.8 magnitude nga linog.
Sumala ni Tulfo, mas angay unahon karon ang pagtagad sa kahimtang sa mga apektadong katawhan ug sa mga lugar nga grabeng naapektuhan sa kalamidad.
Sa pikas bahin, gibutyag ni Senator Erwin Tulfo nga andam siya nga mo-inhibit isip chairperson sa Senate Blue Ribbon Committee sa oras nga pormal na kini mabuo ug masugdan ang opisyal nga pagdungog sa imbestigasyon sa flood control projects.
Gisugyot usab ni Tulfo nga posibleng itugyan niini ang pagpangulo sa imbestigasyon kang Senator Kiko Pangilinan.
Bisan pa niini, gipasiugda niya nga imbitahon gihapon ang 18 ka kanhing bodyguards sa pormal nga hearing.
Apan misupak ang kampo sa mga testigo pinaagi ni Atty. Levito Baligod, nga miingon nga dili patas kung ang usa sa mga gihisgutan sa alegasyon mao usab ang mangulo sa imbestigasyon.
Matud ni Baligod, posibleng maapektuhan ang kredibilidad sa testimonya ug dali ra silang madeklarang nagsulti og bakak.
Kahinumduman, nga napakyas pagtambong ang 18 ka kanhi body guard ug si kanhi House Speaker Martin Romualdez, uban sa pipila ka kongresista, sa gipahigayon nga Senate Blue Ribbon Committee hearing karong Lunes, Hunyo 8.
Kini ang unang pagdungog sa komite ubos sa bag-ong tsirman nga si Senador Erwin Tulfo human sa nahitabong reorganisasyon sa Senado.
Matod sa Committee Secretary, walay nadawat nga tubag ang Senado gikan sa 18 ka kanhi body guard ug sa ilang abogado nga si Atty. Levito Baligod.