Niabot sa North Korea si Chinese President Xi Jinping karong Lunes, Hunyo 8, alang sa usa ka talagsaon ug makasaysayanong state visit—ang iyang labing unang biyahe gawas sa ilang nasod karong tuiga ug ang una niyang pagbisita sa Pyongyang sukad niadtong tuig 2019. Hugot nga gidawat si Xi ug ang iyang asawa nga si Peng Liyuan ni North Korean leader Kim Jong Un ug asawa niini nga si Ri Sol-ju pinaagi sa usa ka magarbohong welcome ceremony nga duna’y red carpet ug saludo sa militar.
Tumong sa maong tigom nga palig-onon ang alyansa ug ang giingong “dili mabungkag nga kahigalaan” tali sa duha ka nasod, ilabi na nga ang China mao ang nag-unang kaalyado sa ekonomiya ug diplomasya sa North Korea taliwala sa mga internasyonal nga silot. Nahitabo ang maong pagbisita human usab nakigkita si Xi kang US President Donald Trump ug Russian President Vladimir Putin didto sa Beijing, samtang nagpabiling pilit ang negosasyon sa nukleyar tali sa Washington ug Pyongyang.
Bisan pa man sa panawagan sa Estados Unidos alang sa denuclearization, gipahayag sa gamhanang igsoon ni Kim Jong Un sa wala pa moabot si Xi nga dili gayod iatras sa North Korea ang ilang nuclear weapons program. Sumala sa mga analista, gidawat na sa China ang North Korea isip usa ka nuclear state ug ang prayoridad karon ni Xi mao ang pagsiguro sa kalig-on sa rehiyon aron magsilbing proteksyon batok sa impluwensya sa Amerika ug sa mga kaalyado niini sa Asya.