Patay ang usa ka lalaki human gipusil-patay sa wala mailhing armado samtang paingon unta sa iyang sakyanan sa Purok 7, South Poblacion, Maramag, Bukidnon, pasado alas-3:55 sa hapon niadtong Hunyo 5.
Subay sa inisyal nga report sa kapulisan, kauban sa biktima ang iyang 36-anyos nga babayeng kauban sa trabaho dihang kalit silang giduolan sa usa ka gunman ug gipusil ang biktima makausa sa wala nga bahin sa iyang dalunggan. Human sa pagpamusil, daling misakay ang suspek sa naghulat nga motorsiklo sa iyang kauban ug paspas nga misibat padulong sa amihanang direksyon.
Gidala pa sa mga personahe sa MDRRMO-Maramag ang biktima ngadto sa Bukidnon Provincial Hospital apan gideklara kining dead on arrival sa attending physician. Sa pagkakaron, padayon pang ginasusi sa mga otoridad ang mga CCTV footage sa lugar, samtang gipaubos na usab ang crime scene sa forensic examination sa SOCO aron mailhan ang mga suspek ug matino ang motibo sa maong pagpamusil.