Tingkagol sa bilanggoan ang usa ka 50-anyos nga lalaki nga giila isip bag-ong nailhang tigpayuhot og ilegal nga droga human natiklo sa gikasang joint buy-bust operation sa Everlasting Village, Barangay Poblacion, Pangantucan, Bukidnon.
Subay sa report sa Bukidnon Police Provincial Office, ang suspek giila sa alyas nga “Edol,” kinsa nadakpan pasado alas-7:40 sa gabii niadtong Hunyo 5 pinaagi sa hiniusang pwersa sa Pangantucan Municipal Police Station, Bukidnon 2nd PMFC, 1,004th Maneuver Company, ug Provincial Intelligence Unit.
Nasakmit gikan sa posisyon ni Edol ang duha ka sachet sa gituohang shabu nga nagtimbang og 5.28 gramos ug adunay standard drug price nga 35,904.00 pesos. Lakip sa narekober sa mga otoridad ang 500 pesos nga buy-bust money ug usa ka Honda XR150 nga motorsiklo nga gigamit sa suspek.
Gihimo ang on-site inventory sa mga ebidensya sa dapit-nahitaboan atubangan sa usa ka barangay kagawad ug representante sa media. Sa pagkakaron, ang suspetsado anaa na sa kustodiya sa Pangantucan MPS alang sa dokumentasyon ug pag-andam sa kasong paglapas sa Republic Act 9,165.