Nakabsan sa kinabuhi ang usa ka real estate agent human kini gipusil-patay sa wala mailhing lalaki sa may Purok 7, South Poblacion, lungsod sa Maramag, Bukidnon, kagahapong adlawa, Biyernes sa hapon, Hunyo 5 ning kasamtangang tuig.
Ang biktima giila sa kapulisan nga si Rencie Vasquez Capua, minyo ug lumulupyo sa San Carlos, Bagontaas, dakbayan sa Valencia.
Subay sa pakisusi sa Maramag Municipal Police Station, mosulod na matud pa sa iyang sakyanan si Capua uban sa iyang kaubang ahente nga si Flordeliza Apaap Cabasa sa dihang kalit lang mibutho ang armado nga suspek ug gipusil ang biktima sa kausa ka higayon, apan swerteng wala maigo ang iyang kaubang babaye. Human sa krimen, daling misakay ang gunman sa nagpaabot nga motorsiklo nga gimaneho sa kauban niini ug paspas nga miikyas paingon sa amihanang direksyon sa lungsod.
Bisan pa man sa dinalian nga pagdala sa mga responders sa MDRRMO-Maramag ngadto sa ospital, gideklara nga patay na ang biktima sa attending physician niini.
Sa pagkakaron, personal nga gidumala ni Police Lieutenant Colonel Alexander Eugenio, ang hepe sa Maramag MPS, ang tibuok alert team ug mga imbestigador aron subaybayan pag-ayo ang kaso.
Nakig-unong na usab ang lokal nga kapulisan sa Bukidnon Provincial Forensic Scene Unit alang sa pag-analisar sa dapit-nahitaboan samtang padayon pa nilang gisuta ang motibo sa maong pagpamusil aron mapatubag sa balaod ang mga miikyas nga suspetsado.