Patay ang usa ka indibidwal ug kapin sa 60 ang nasamdan human maigo sa drone strikes ang Kuwait International Airport taliwala sa nagkagrabeng tensyon tali sa Estados Unidos ug Iran.
Gihulagway sa Kuwait Ministry of Defence ang insidente isip “criminal Iranian aggression,” samtang sigon sa foreign ministry nga adunay pipila ka diplomatic missions nga nadaot sa pag-atake.
Sumala sa Islamic Revolutionary Guard Corps o IRGC, sila ang naglunsad sa operasyon ug giingong balos kini sa bag-ohay nga aksyon sa Amerika batok sa usa ka Iranian oil tanker ug sa Qeshm Island.
Sumala usab sa Iran nga target niini ang mga U.S. base sa nagkadaiyang bahin sa Gulf region.
Gikumpirmang usa ka Indian national ang namatay, samtang matud sa India’s foreign ministry nga adunay pipila ka Indian citizens nga naapil sa mga nasamdan ug nanawagan kini og dayong de-escalation.
Isip tubag, gimando sa Kuwait ang duha ka Iranian diplomats nga mobiya sa nasud sulod sa 24 oras ug gipatawag usab ang Iranian chargé d’affaires.
Matud sa U.S. Central Command o CENTCOM, naghimo usab sila og overnight strikes sa Qeshm Island isip tubag sa giingong planong pag-atake sa Iran sa Middle East.
Matud usab sa CENTCOM nga ilang na-intercept ang pipila ka Iranian drones ug missiles sa Kuwait, Bahrain, ug mga civilian maritime routes.
Samtang, giinsistir sa Iran nga nanimalos lamang sila pinaagi sa missile ug drone strikes batok sa U.S. bases ug helicopter operations sa usa ka wala ginganli nga nasud sa rehiyon, ug giakusahan ang Kuwait ug Bahrain nga direktang nanghilabot sa kagubot.