Sikop sa mga otoridad ang giila nga Top 1 Most Wanted Person sa lebel sa probinsya sa Bukidnon atol sa gikasang manhunt operation sa lungsod sa Impasugong.
Giila niini sa kapolisan ang dinakpan nga si Jerome Sofia Tulosan 33 anyos ug residente sa Purok 9 Barangay Poblacion sa maong lungsod kinsa nasikop sa mga operatiba sa Impasugong Municipal Police Station sa may alas 3:40 sa hapon niadtong Martes.
Gisilsil sa mga otoridad nga nadakpan ang suspek sa gahom sa warrant of arrest nga giisyu sa korte may kalabutan sa seryosong kasong paglapas sa Comprehensive Dangerous Drugs Act diin walay gitakda nga piyansa alang sa iyang temporaryong kagawasan.
Sa pagkakaron anaa na sa sulod sa selda sa Impasugong Police Station ang dinakpan alang sa hustong dokumentasyon sa dili pa kini itugyan ngadto sa hukmanan nga nag-isyu sa iyang warrant.