Nagpabiling dakong hagit ang kakulangon sa mga classrooms sa pipila ka tulunghaan ning dakbayan sa Malaybalay.
Kini ang nahimong unod sa pamahayag ni Sonny M. Rojas, ang School Principal IV sa Dalwangan Elementary School, taliwala sa pagpahigayon sa ikaduhang adlaw sa Brigada Eskwela sa maong tulunghaan.
Sumala ni Rojas, gawas sa kinatibuk-ang kakulang sa mga lawak-sounan, duna pa silay duha ka mga classrooms sa pagkakaron nga narekord na nga kinahanglang guboon o ipaubos sa demolition tungod kay dili na kini madala sa yano o bisan sa major repair tungod sa kagubaton o kadaan niini.
Dugang pa niini, gipatin-aw sa kadagkoan sa tunghaan nga taliwala sa maong hagit, walay ipahigayon nga klase sa mga hawan nga dapit o sa covered court.
Gipaniguro niini nga ang tanang mga tinun-an makasulod sa sulod sa mga lawak pagtulun-an sa umaabot nga pag-abli sa klase.
Gawas niini, gipadayag usab nga anaa sa saktong ihap ang pwersa sa maong tulunghaan diin aduna silay 27 ka mga magtutudlo ug upat ka non-teaching staff.