Kalit nga mibanlas ang lapad nga pagbaha sa bahin sa Barangay Apu Macote ning syudad sa Malaybalay human kini gibundakan sa hilabihang kusog nga ulan kagahapon sa hapon.
Sa nakuha nga mga hulagway ug subay na usab sa gihimong Facebook Livestream sa usa ka residente nga giilang si Alen Micabalo, daling mitaas ang lebel sa tubig hinungdan nga gilunopan ang mga halapad nga basakan sa maong dapit.
Gawas sa mga pananom, nakasinati usab ug pagsaka sa tubig-baha ang pipila ka mga kabalayan diin dako ang kabalaka sa mga molupyo sa posibleng dugang pa nga pag-awas sa tubig kon magpadayon ang dautang dagan sa panahon.
Bisan pa man sa kalit nga pagsulod sa tubig sa mga panimalay, gibutyag sa mga awtoridad nga wala ray natala nga opisyal nga mibakwit o mibiya sa ilang mga panimalay sa kasamtangan, samtang padayon nga gina-monitor ang sitwasyon sa dapit.