Tulo ka indibidwal ang nasikop sa mga otoridad human nakuhaan og nagkadaiyang pakete sa gidudahang shabu nga nagkantidad og kapin ₱118,000 sa duha ka managlahing buy-bust operations sa siyudad sa Valencia.
Unang gilusad ang operasyon niadtong Mayo 30, takna sa alas 4:52 sa hapon sa Purok 3, Barangay Lumbo, diin nadakpan si alyas “Biboy,” 24 anyos, ug alyas “Louie,” 33 anyos.
Nakuha gikan sa duha ang gibanabanaang ₱82,280 nga kantidad sa ilegal nga droga kauban ang usa ka cellphone, motorsiklo, ug buy-bust money.
Sa laing bahin, nasikop ang giilang si alyas “Roger,” 54 anyos ug usa ka utility worker, sa laing buy-bust operation niadtong Mayo 31, pasado alas 12:36 sa kadlawon sa Barangay Poblacion. Nasakmit gikan sa posisyon niini ang dugang shabu nga nagkantidad og ₱36,040, lakip na ang gigamit niining cellphone ug drug paraphernalia.
Sa pagkakaron, ang tulo ka mga suspetsado temporaryong nagkatingkagol sa Valencia City Police Station samtang giandam na ang kasong paglapas sa Comprehensive Dangerous Drugs Act of 2002 batok kanila.