Nagpasalig ang House Prosecution Panel nga dili maapektuhan sa impeachment trial batok kang Vice President Sara Duterte ang pagdumala sa gobyerno sa ubang importanteng mga isyu sa nasud.
Matud ni Rep. Jude Acidre, padayon gihapon ang trabaho sa Kamara ug sa administrasyon samtang nag-andam ang prosecution panel alang sa umaabot nga impeachment proceedings sa Senado.
Sumala sa kongresista, kasamtangan nang girepaso sa House prosecutors ang mga ebidensya ug testimonya nga nakuha sa mga naunang pagdungog aron masiguro ang lig-on nga presentasyon sa kaso.
Nagpadayon usab ang ilang koordinasyon sa civil society ug ubang stakeholders nga nagbantay sa maong proseso.
Gikuwestiyon usab ni Acidre ang pipila ka sugyot sa Senado sama sa remote participation o online attendance sa mga senator-judges.
Matud ni Acidre, importante nga personal nga makatambong ang mga senador sa impeachment trial aron direkta nilang maobserbahan ang mga testigo, ebidensya, ug pamatasan sa mga motestigo, nga usa ka importante nga bahin sa patas ug kredibleng proseso sa paghusay.
Bisan pa sa mga kontrobersiya ug isyung politikal nga naglibot sa Senado, nagpabilin nga kumpiyansa si Acidre nga matuman sa Senado ang iyang mandato isip impeachment court ug dili mapugngan ang pag-uswag sa pagdungog batok sa Bise Presidente.