Inahan sa upat ka anak, patay samtang naglinya alang sa tag P20.00 nga bugas

Nakabsan sa hinulamang kinabuhi ang usa ka 28-anyos nga inahan sa upat ka anak human kini kalit nga natumba samtang naglinya aron makapalit sa P20 matag kilo nga bugas sa lungsod sa Don Carlos, Bukidnon niadtong Mayo 25.

Matud sa apohan sa biktima nga si Lusminda Valoria, gisaysay nga kalit lang nawad-an sa panimuot ang iyang apo nga si Desiree Binagatan taliwala sa paghulat sa maong baratong bugas.

Dali pa nga gidala sa pamilya ang biktima sa balay-tambalan sa tinguha nga masalbar pa ang kinabuhi niini, apan gideklara na kini sa mga doktor nga dead on arrival.

Gumikan sa maong kalit nga trahedya, nagbilin si Binagatan og upat ka gagmay pang mga anak ug usa ka pamilyang nag-atubang karon sa tumang kapiot ug kalisod sa pinansyal.