Aron hingpit nga mapanalipdan ang kaugmaon sa mga kabatan-onan, mas gipahugtan pa karon sa 8th Infantry Battalion ang pagpahigayon og mga lectures ug community engagement sa nagkadaiyang hilit nga dapit sa probinsya sa Bukidnon.
Pinaagi sa pagtapok sa mga kabatan-onan ug mga lider sa komunidad, personal nga nakig-atubang ang mga personahe sa Philippine Army aron ipasabot ang kamahinungdanon sa ilang papel sa pagkab-ot sa kalinaw.
Gawas niini, gitudloan usab ang mga partisipante sa mga pamaagi aron dili sila daling malimbongan o ma-rekrut sa mga rebeldeng grupo.
Gilauman nga pinaagi niining padayon nga “Community Outreach ug Information Drive,” mas mapalapdan pa ang kahibalo sa publiko ug mas magpabiling solido ang suporta sa katawhan ngadto sa kasundalohan alang sa malungtarong kalinaw sa rehiyon.
Sa pikas bahin, pormal nga giila ug gipasidunggan sa Lokal nga Kagamhanan sa Impasugong, Bukidnon ang pwersa sa 8th Infantry “Dependable” Battalion ubos sa 4th Infantry Division sa Philippine Army.
Kini human gitunol sa maong LGU ang usa ka Plaque of Recognition ngadto sa kadagkoan sa militar isip pagpasalamat sa ilang “Outstanding Service and Partnership” nga dako og natabang sa pagmentinar sa kahapsay ug kalinaw sa lungsod.
Atol sa maong kalihokan, gipahayag sa opisyal sa 8th IB nga ang maong dungog dili lang alang sa militar, kondili timailhan usab sa nagkahiusang pwersa sa gobyerno ug sa komunidad aron sumpoon ang insurhensya ug iduso ang tinuoray nga kalamboan.