Nakalabang na sa ikaduhang pagbasa sa Sangguniang Panlungsod (SP) sa dakbayan sa Malaybalay ang gisugyot nga bag-ong Tourism Code atol sa sesyon niadtong Mayo 26, 2026.
Ang maong ordinansa giduso ni City Councilor Brian Nelson T. Flores, ang Chairperson sa Committee on Tourism, diin gipresinta niini ang tinguha sa lokal nga kagamhanan nga mapalig-on ang pagdumala sa turismo, pagpreserba sa kultura, ug paghatag og suporta sa maong lokal nga industriya.
Dugang pa sa konsel nga ang maong sugyot balaodnon, nagtumong dili lamang sa kultural ug tradisyunal nga kalambuan apan lakip usab ang kahimtang ug pangibuhian sa katawhan sa dakbayan. Â
Nasayran nga ang maong balaodnon resulta sa kolaborasyon sa LGU Malaybalay ug sa Bukidnon State University (BukSU), pinaagi sa Faculty of Hospitality Management, human sa gihimong sunod-sunod nga konsultasyon ug panukiduki.
Sa pagkakaron, gipahigayon ang dugang pagtuon ug pagplastar sa mga probisyon sa maong code sa dili pa kini isalang sa ikatulo ug pinal nga pagbasa sa umaabot nga mga sesyon.