Gitu-uhang kapin sa 200-kilos sa gitu-uhang ambergis kon suka sa balyena, ang nakuha sa mga mananagat sa Barangay Tibpuan, lungsod sa Lebak, Sultan Kudarat.
Sumala sa nag-post sa video, gipa-abot pa nila ang kumpirmasyon gikan sa Bureau of Fisheries and Aquatic Resources kon BFAR kung tinuod pa nga suka kini sa balyena.
Nasayrang ang ambergis, usa ka talagsaon ug mahalon nga substansiya nga kasagarang gikan sa tinai sa Sperm Whale nga kolor abo, itom, o dalag kansa mugahi human mulutaw sa dagat sulod sa dugay nga panahon.
Aduna kini kusog nga baho sa sinugdanan nga muhumot samtang magkadugay ug kini mahal tungod kay kini man ang gigamit sa fragrance industry aron mulungtad og dugay ang baho sa pahumot o perfume.
Tungod kay talagsaon kini, mahal kaayo ang presyo niini ug usahay mokantidad og milyones pesos matag-kilo depende sa gidak-on ug kalidad.
Sa ubang nasod, adunay mga balaod bahin sa pagbaligya sa ambergris aron mapanalipdan ang mga balyena.