Mipatik sa kasaysayan ang ika-20 nga Congress of the Philippines karong adlawa human gipahibalo ni Bicol Saro Partylist Rep.Terry Ridon nga pagabotohan pag-usab sa House of Representatives of the Philippines ang impeachment batok kang VP Sara Duterte.
Sumala ni Ridon, gilauman nga moabot sa 215 ka boto ang mosuporta sa pagpadayon sa impeachment trial, susama sa gidaghanon sa miaging tuig.
Base sa taho sa House Committee on Justice, nadiskubre ang kapin P6.77 bilyon nga mga transaksyon sa mga account sa bise presidente ug sa iyang bana, nga layo sa P88.5 milyon lamang nga gi-deklarar sa iyang 2024 SALN.
Dugang pa niini, gimando sa Commission on Audit ang pagbalik sa P448 milyon isip personal nga pananagutan gikan sa mga gi-disallow nga confidential fund expenditures.
Gibutyag usab ni Ridon nga adunay mga video recordings nga napamatud-ang tinuod nga nagpakita sa giingong diretsahang hulga sa bise presidente batok kang Presidente Ferdinand Marcos Jr., sa First Lady Liza Marcos, ug sa kanhing Speaker Martin Romualdez sa Kamara.
Matud ni Ridon, ang tanan niini klarong timailhan sa betrayal of public trust ug paglapas sa Konstitusyon.
Dugang niya, ang botohan karong adlawa dili lamang usa ka politikal nga lakang kondili usa ka konstitusyonal nga aksyon sa pagpanubag.
Matud pa niini, kini usa ka pakigbisog alang sa kamatuoran, pagpanubag, ug hustisya.