Tingkagol na sa prisohan ang upat ka mga indibidwal, lakip na ang mga drayber sa sikad, human maaktuhang nagpahigayon og pot session sa Brgy. Saray, Iligan City, niadtong hapon sa Mayo 10, 2026.
Ang mga dinakpan giila pinaagi sa mga alyas nga silang “Noel,” 34 anyos; “Carlos Jr.,” 48 anyos; “Alfunso,” 48 anyos; ug “Marilou,” 53 anyos, kinsa pulos mga residente sa maong dakbayan.
Niduso sa operasyon ang mga operatiba sa Police Station 5 sa Iligan City Police Office (ICPO) banda alas-5:20 sa hapon human makadawat og impormasyon gikan sa usa ka mabinantayong lungsoranon bahin sa nagpadayong paggamit og ilegal nga droga sa maong dapit.
Pag-abot sa mga otoridad, naabtan ang mga suspek nga sa aktong migamit og gituohang shabu. Narekober gikan sa dapit ang pipila ka pakete sa gidili nga droga uban ang mga kagamitan sama sa gunting, improvised foil strips, mga lighter nga dunay foil needle, ug mga improvised foil tooter.
Sa pagkakaron, anaa na sa kustodiya sa Police Station 5 ang mga dinakpan samtang giandam na ang pormal nga kasong paglapag sa Republic Act No. 9165 o ang Comprehensive Dangerous Drugs Act of 2002 batok kanila.