Gipanghimakak ni Manila 3rd District Representative Joel Chua ang alegasyon ni Davao City Rep. Paolo Duterte nga giingong gipanghulga o gi-blackmail ang mga miyembro sa House Committee on Justice aron lang suportahan ang impeachment case batok kang Vice President Sara Duterte.
Sumala sa alegasyon ni Rep. Paolo Duterte, giingong gitawagan ang mga chief of staff sa pipila ka mambabalaod ug gi-pressure nga mobotar pabor sa impeachment, ug giingon pa nga kung dili mosunod, mahimong tangtangon ang pondo sa ilang mga distrito.
Apan klaro nga gipanghimakak ni Chua ang maong mga akusasyon ug giingon nga walay nahitabo nga blackmail sulod sa deliberasyon sa komite.
Gibalik-balik usab niini nga ang kampo sa mga Duterte kasagarang nag-file og mga petisyon ug kaso aron mapahunong ang hearing, dugang pa nga sila mismo wala motambong sa mga pagdungog bisan pa og giatagan og higayon.
Sumala ni Chua nga ang komite nagpadayon sa ilang trabaho base sa proseso ug ebidensya, ug dili sa mga alegasyon nga walay lig-on nga basehan.