Tenis star Alex Eala, laumang musalmot sa duha ka tournaments sa Mayo

Gipahimuslan sa Pinoy tennis star nga si Alex Eala ang higayon nga makapahuway lakip na ang pagbawi og kusog sa Mallorca, Spain isip preparasyon sa pagsalmot niini sa prestihiyosong Internazionali BNL d’Italia sa Rome nga sugdan karong Mayo 5 hangtod 17, 2026.

Ang maong WTA 1000 tournament, ipahigayon sa Foro Italico, ug maoy usa sa mga labing  mahinungdanong “buildup” ni Eala sa dili pa ang French Open (Roland Garros) nga gikatakda sa Mayo 18 hangtod Hunyo 7.

Gawas sa Rome, gilista usab ang 20-anyos nga Filipina ace sa Parma Ladies Open sugod Mayo 11 hangtod 17, apan magdepende pa kini sa dagan sa maong atleta sa torneyo sa Rome sanglit mag-abot ang iskedyul sa duha ka dagkong kompetisyon sa Italy.