Balhog sa bilangguan ang usa ka 29-anyos nga lalaki human madakpan sa gipahigayon nga buy-bust operation sa Purok 6A, Barangay Poblacion sa Valencia City niadtong udto sa Abril 28, 2026.
Giila ang suspek sa alyas nga “Bryan,” ulitawo ug residente sa maong dapit.
Ang operasyon malampusong gihimo pinaagi sa hiniusang pwersa sa Bukidnon Police Drug Enforcement Unit, Philippine Drug Enforcement Agency-10 Bukidnon Provincial Office, Valencia City Police Station, Bukidnon Police Intelligence Unit, 2nd Bukidnon Provincial Mobile Force Company, ug City Anti-Drugs Special Unit Team ubos sa buhatan sa mayor.
Narekober gikan sa suspek ang gituohang shabu nga nagkantidad og gibanabanang ₱85,000, pinauga nga marijuana nga kapin sa ₱1,530, buy-bust money ug uban pang drug paraphernalia.
Ang suspek anaa na karon sa kustodiya sa Valencia CPS alang sa hustong dokumentasyon ug pagpasaka og kaso tungod sa paglapas sa Comprehensive Dangerous Drugs Act of 2002.