Patay ang usa ka mag-uuma human kini gipusil sa wala pa mailhing suspetsado samtang nagmaneho sa iyang motorsiklo sa Purok 4, Barangay Labuagon sa lungsod sa Kibawe, niadtong Miyerkules sa buntag.
Sa pakighinabi sa Bombo Radyo Malaybalay ngadto kang PCpt. Sheila Joy P. Jangad, ang tigpamaba sa Bukidnon PPO, giila ang biktima nga si alyas Edie, 53-anyos ug residente sa Barangay Gutapol sa maong lungsod. Nahitabo ang insidente alas 6:45 sa buntag sa atubangan mismo sa NGCP Kibawe Substation.
Base sa inisyal nga imbestigasyon, gipahunong matud pa sa suspek ang biktima samtang naglawig kini sa dalan ug dihadiha dayon gipusil sa ulo. Daling mikalagiw ang mamumuno paingon sa amihanan human sa krimen, samtang ang biktima gideklara nga Dead on Arrival (DOA) sa dihang nadala sa ospital.
Narekober sa dapit-nahitaboan ang usa ka basyo sa bala ug ang motorsiklo sa biktima nga gipaubos na karon sa forensic examination.
Tungod sa maong hitabo, gilayon nga gipatuman sa kapulisan ang Oplan Shield sa mga kasikbit nga lungsod dungan sa gipahigayon nga hot pursuit operation aron masikop ang responsable ug mahatagan og hustisya ang biktima.