Nasikop sa hiniusang pwersa sa kapulisan ug militar ang usa ka 55-anyos nga lalaki nga nag-atubang og kasong murder atol sa gikasang operasyon sa Barangay Poblacion, Cabanglasan, niadtong Abril 14, 2026.
Matod sa otoridad, giila ang dinakpan nga si Virgilio Sumahan Estomo, residente sa Dagumbaan, Maramag, ug usa ka kanhi rebelde nga nibalik-loob na sa gobyerno. Ang suspek nasikop pinaagi sa gahum sa Warrant of Arrest alang sa kasong murder diin wala’y girekomendar nga piyansa ang korte alang sa iyang temporaryong kagawasan.
Ang maong malampusong operasyon gipangulohan sa Cabanglasan Municipal Police Station ubos ni PCPT Linomer L. Caseres, kauban ang 3rd Special Forces Company sa Philippine Army ug ang Provincial Intelligence Unit.
Sa pagkakaron, ang dinakpan anaa na sa kustodiya sa militar sa Sitio Bulak, Barangay Iba, samtang nagpaabot sa sunod nga mando sa korte alang sa pag-atubang sa iyang kaso. Giisip sa otoridad ang maong pagdakop nga usa ka dakong kalampusan sa pagpatunhay sa hustisya sa tibuok lalawigan.