Human sa 14 ka tuig nga pagpuyo isip “live-in partners,” sa katapusan napalig-on na ang relasyon sa usa ka magtiayon pinaagi sa gipahigayon nga Tribal Mass Wedding dungan sa selebrasyon sa Kaamulan Festival 2026.
Sa pakighinabi sa Bombo Radyo Malaybalay, gipahayag ni Jennes Biais nga ang nag-unang rason sa ilang pag-apil sa maong kasal mao ang paghatag og legal nga identidad sa ilang mga anak ug ang pagdawat sa bendisyon sa Labaw’ng Makagagahum ug sa ilang mga tribal elders.
Si Jennes, kinsa usa ka Matigsalug, ug ang iyang bana nga si Charity Disalan, usa ka Bisaya, nagkauyon nga panahon na aron himuong pormal ug legal ang ilang panag-uban bisan pa man sa kadugay na sa ilang pag-ipon didto sa lungsod sa San Fernando, Bukidnon.
Gawas sa tinguha nga ma-legal ang ilang status, dako usab og tabang ang libreng serbisyo nga gitanyag sa kagamhanan ug sa tribal leaders. Lakip sa libreng nadawat sa magtiayon mao ang transportasyon, pagkaon, ug ayuda sa pagproseso sa ilang mga papeles—hinungdan nga wala na sila nagduha-duha pa sa pagpalista.
Gipaabot sa magtiayon ang ilang dakong pasalamat ngadto sa lokal nga kagamhanan, sa mga IP Leaders, ug ilabi na sa gobernador sa suporta nga gihatag aron magmalampuson ang ilang panumpa.
Sa katapusan, giawhag ni Jennes ang ubang mga magtiayong IP ug kadtong mga nagpuyo pa nga walay legal nga papeles nga pahimuslan ang maong programa sa gobyerno aron mapanalipdan ang kaugmaon ug legal nga kahimtang sa ilang mga anak.