Nakatingkagol na karon sa selda sa kapulisan ang usa ka 61-anyos nga lalaki human niini gitutukan og pusil ug gihulga ang iyang kaugalingong igsoon sa Purok 1A, Barangay Poblacion, Libona, Bukidnon.
Base sa report sa mga otoridad, nahitabo ang insidente niadtong milabayng adlaw( Abril 1, 2026 ), pasado alas-6:50 sa gabii. Nasayran nga ang 43-anyos nga biktima daling miadto sa Libona Municipal Police Station aron itaho ang pagpanghulga sa iyang igsoon gamit ang armas.
Sumala sa imbestigasyon, miadto ang biktima sa balay sa ilang inahan apan giingong gisinggitan ug gipapahawa kini sa suspek, nga misangpot sa usa ka mainitong panaglalis. Sa tunga-tunga sa ilang away, mikuha ang suspek og caliber .45 pistol ug gitutok kini sa biktima dungan sa pagpanghulga.
Dali nga miresponde ang mga sakop sa Libona MPS diin nasakmit gikan sa suspek ang usa ka Para-Ordnance cal. .45 pistol uban ang siyam ka mga buhing bala.
Sa pagkakaron, ang suspek ug ang nakompiskang armas anaa na sa kustodiya sa kapulisan alang sa saktong disposisyon. Giandam na usab ang kasong Grave Threats ug posibleng paglapas sa Comprehensive Firearms and Ammunition Regulation Act (RA 10591) batok sa maong dinakpan. Gitan-aw sa kapulisan nga ang panaglalis sa kabilin nga yuta ang nag-unang motibo sa maong insidente.