Nakadawat ang kapin 500 ka mga kwalipikadong tricycle drivers og Cash Relief Assistance sa payout nga gipahigayon sa Department of Social Welfare and Development (DSWD) karong adlawa, Abril 8, 2026 sa Barangay Covered Court sa Casisang, Malaybalay City.
Ang 596 ka mga drayber gibahin sa duha ka batch aron malikayan ang panagtapok sa daghang tawo. Ang mga adunay apelyido nga nagsugod sa letrang A hangtod sa L ginasebisyohan takna alas 9:00 sa buntag, samtang ang mga nagsugod sa M hangtod Y ginasebisyohan sa 1:00 sa hapon.
Sa pakighinabi sa Bombo radyo Malaybalay ngadto kang Ivy Amor Urbina, Head Officer sa City Social Welfare and Development Office gikumpirma niini nga siguradong makadawat sa maong hinabang ang ang 596 ka mga mga drayber nga anaa sa maong listahan nga gipagawas sa buhatan sa DSWD.
Samtang gisaysay ni Marlon Igpit, ang Federation President sa MORELA sa Malaybalay City, nga nakasinati og pipila ka mga hagit ang pag-apud-apod sa fuel subsidy sa dakbayan.
Sumala kaniya, gikan sa 596 ka benepisyaryo nga gi-aprobahan sa nasudnong kagamhanan, wala kini matuman sa hingpit tungod sa nakitang mga double entry sa listahan sa mga drayber apan gipaningkamutan nila nga mapulihan kini og laing opisyal nga mga drayber aron makadawat usab sa maong hinabang.
Gipahayag usab ni Igpit nga ang nadawat nga P5,000 nga ayuda dako na og tabang alang sa mga drayber sa pampublikong sakyanan, bisan pa man kon dili kini paigo sa padayon nga pagsaka sa presyo sa lana.