Nalandig sa balay-tambalanan ang usa ka 50-anyos nga lalaki human kini gidunggab sa 56-anyos nga hubog nga suspetsado sa Purok 1, Barangay Puntian, Quezon, Bukidnon, niadtong Miyerkules sa gabii, Nobyembre 18, 2026.
Subay sa taho nga giduso ni Bukidnon Police Provincial Office (BukPPO) Provincial Director Police Colonel Oliver Sotto Navales ngadto kang Police Regional Office 10 (PRO-10) Regional Director Police Brigadier General Nestor Babagay Jr., nagkalalis ang duha alas-5:30 sa hapon sa wala pa mikuha og kutsilyo ang hubog nga suspetsado ug gidunggab makausa sa likod ang biktima alas-6:10 sa gabii.
Dali nga gidala ang biktima sa Quezon Health Infirmary Hospital alang sa dinaliang pagtambal, samtang nasikop usab dayon sa mga mirespondeng barangay tanod sa Barangay Puntian ang suspetsado.
Gitugyan na sa mga barangay tanod ang dinakpan ngadto sa Quezon Municipal Police Station diin kini kasamtangang gibalhog alang sa tukmang disposasyon ug pagpasaka og kaso.

