Gihulagway sa House Prosecution Panel nga diversionary tactic lamang ang alegasyon sa kampo ni Vice President Sara Duterte bahin sa giingong no-election scenario sa 2028 aron malihis ang atensyon sa publiko gikan sa impeachment trial batok sa bise presidente.
Gihagit ni Manila Representative Joel Chua si Atty. Salvador Panelo nga pamatud-an ang iyang mga pasangil imbes magpagawas og mga isyung walay kalambigitan sa husay, samtang gipasiugda ni House Prosecution tigpamaba Zia Alonto Adiong nga angay tubagon sa depensa ang mga financial evidence sa prosekusyon.
Gipanghimakak usab ni House Senior Deputy Speaker Ferdinand Hernandez nga adunay plano ang Kamara nga ipalangan ang piniliay sa 2028 o lugwayan ang termino sa mga opisyal.
Sa laing bahin, gikuwestiyon ni House prosecutor Chel Diokno ang kredibilidad sa AMLC witness sa depensa human masayran nga wala kini makabasa sa mga dokumento nga may kalambigitan sa iyang gihatag nga opinyon sa husay.

