Nakauli sa Pilipinas ang kinatibuk-ang 338 ka Pilipino sa nasud kagahapong Domingo, Marso 29, pinaagi sa ika-unom nga chartered repatriation flight sa gobyerno.
Naglangkob kini sa mga overseas Filipino workers (OFWs), pipila ka mga pamilya, ug mga Pilipinong na-stranded sa United Arab Emirates.
Nanguna sa pagtagbo ang mga representante sa Department of Migrant Workers (DMW) ug Overseas Workers Welfare Administration (OWWA), kauban ang Department of Foreign Affairs (DFA) ug Presidential Management Staff (PMS).
Apil usab sa pagdawat ang mga representante sa Department of Health (DOH), Bureau of Customs (BOC), Bureau of Immigration (BI), Bureau of Quarantine (BOQ), Department of Social Welfare and Development (DSWD), ug Philippine Air Force.
Gihatagan ang mga returnees og pinansyal nga tabang, medikal nga suporta, pondo para sa transportasyon pauli sa ilang mga probinsya, ug temporaryong puy-anan samtang temporaryong mapabilin sa Metro Manila.
Gikan sa 338 ka na-repatriate, 203 ang OFWs, 125 ang ilang pamilya, ug 10 ang mga stranded nga Pilipino. Matud sa mga awtoridad nga ang bag-ong batch nagdala sa kinatibuk-ang 3,248 ka Pilipino nga natabangan nga makabalik gikan sa Middle East.