KITAOTAO, BUKIDNON — Tulo ka sachet sa gitoohang shabu nga nagbalor og ₱14,280 ang nasakmit samtang nadakpan ang duha ka giingong street-level nga tigpayuhot og gidiling droga sa gipahigayong joint buy-bust operation sa Purok 1, Barangay Magsaysay, Lungsod sa Kitaotao niadtong Lunes sa kadlawon, Agosto 17, 2026.
Giila sa pulisya ang mga nasikop nga duha ka lalaki nga pulos anaa sa hustong pangedaron. Gawas sa 2.1 gramos nga shabu, nakuha usab gikan sa ilang posisyon ang usa ka cellphone, kagamitan sa pagpanigarilyo o paggamit og droga, usa ka motorsiklo nga Kawasaki Bajaj, ug ang gigamit nga buy-bust money.
Gipahigayon ang maong operasyon sa Kitaotao Municipal Police Station (MPS) kauban ang 2nd Bukidnon PMFC ug Provincial Intelligence Unit. Kasamtangang gitanggong sa Kitaotao MPS ang mga suspek samtang giandam na ang kasong paglapas sa Republic Act 9165 o Comprehensive Dangerous Drugs Act of 2002 batok kanila.