Usa patay, samtang laing usa ang angol human sa nahitabong panagbangga sa duha ka motorsiklo sa Sayre Highway, Sitio Cabalansihan, Brgy. Sinuda, Kitaotao, Bukidnon niadtong milabayang adlaw, ning kasamtangang tuig.
Giila ang nakalas nga si alyas Teodoro, 54 anyos, kinsa nagmaneho sa iyang motorsiklo, samtang ang naangol mao si alyas Jimuel, 26 anyos nga taga-Davao City ug drayber sa usa ka Yamaha XMAX.
Subay sa imbestigasyon, susamang nagbiyahe padulong sa Brgy. Sinuda ang duha ka sakyanan apan pag-abot sa maong dapit, kalit nga nimaniobra sa wala nga bahin si Teodoro hinungdan nga nadasmagan kini sa nagsunod nga motorsiklo ni Jimuel.
Gidala pa sa German Doctors Hospital sa Buda ang duha ka biktima diin gideklarang dead on arrival si Teodoro, samtang gibalhin na usab sa Southern Philippines Medical Center si Jimuel alang sa dugang nga pagtambal samtang ang mga motorsiklo anaa na karon sa Kitaotao MPS.