Nagpadayon ang pag-ila sa kalidad sa kape sa Bukidnon human makadaog og Top 1 ang Inhandig Tribal Multi-Purpose Cooperative (ITMPC) sa Philippine Coffee Quality Competition (PCQC) 2026 sa kategoriya sa washed Arabica.
Sa eksklusibong pakighinabi sa Bombo Radyo Malaybalay sa programang Zona Libre, kang Merly Omarol Suday, general manager sa kooperatiba, bunga kini sa padayon nga paningkamot sa ilang mga mag-uuma sa Daraghuyan Ancestral Domain sa pagprodyus og dekalidad nga kape pinaagi sa husto nga pag-atiman ug pagproseso.
Matud usab ni Suday, dako ang kahulugan sa maong kadaugan dili lamang alang sa ilang kooperatiba kondili usab sa tibuok komunidad sa Daraghuyan, tungod kay nagpakita kini nga ang mga lumad nga mag-uuma makahimo usab og world-class nga kalidad sa kape.
Dugang pa niini, ang industriya sa kape dakong tinubdan sa panginabuhian sa daghang pamilya ug nakatabang usab sa pagpanalipod sa kalikupan pinaagi sa reforestation.
Gipasalamatan usab niini ang suporta sa Provincial Government of Bukidnon ilalom sa Coffee Roadmap, nga naghatag og mga materyales alang sa nursery ug pagpalapad sa produksyon aron matubag ang nagkataas nga panginahanglan sa merkado.