Gipanghimakak sa mga kanhing sundalo ang alegasyon nga gisuholan sila ni kanhing Congressman Mike Defensor aron motestigo sa imbestigasyon sa giingong maanomalyang flood control projects.
Sa pagdungog sa Senate Blue Ribbon subcommittee kagahapong adlawa Huwebes, gipasiugda ni Johnny Buduan, usa sa 18 ka ex-Marines nga mitunga isip resource person, nga wala sila nakadawat og bisan unsang kwarta gikan kang kanhing Cong. Defensor.
Gitubag ni Buduan ang pangutana ni Senador Rodante Marcoleta kung nakadawat ba sila og “pabuya”o tanyag nga ₱5 milyon matag usa aron motestigo sa kaso.
Gihagit usab niya ang nag-akusar kanila nga motunga sa pagdungog aron pamatud-an ang ilang giingong akusasyon batok kanila.
Dugang pa niini nga kon tinuod pa nga nakadawat sila og ingon ka dako nga kantidad, unta mas nindot na ang ilang kahimtang karon sa kinabuhi.
Gipadayag usab ni Crisaniel Dado, usa sa mga miyembro sa gitawag nga “18 Marines,” nga naulaw siya sa paghangyo og tabang kang Atty. Levito Baligod.
Matud ni Dado, kung naa lang siya’y ₱5 milyones, dili na unta siya motunga uban sa uban pang miyembro isip resource person sa Senate Blue Ribbon Committee.
Giingon usab niya nga naglisod ang iyang pamilya ug gigutom, apan ang ilang pagbutyag sa impormasyon dili para sa personal nga kaayohan kundili para sa kaayohan sa nasud.
Samtang, gidepensahan ni Atty. Levito Baligod ang mga kanhing sundalo batok sa alegasyon nga nakadawat sila og suhol.