Gikomendahan sa Regional Peace and Order Council (RPOC)-10 ang tibuok pwersa sa Police Regional Office (PRO)-10, ubos sa pagpangulo sa ilang Regional Director, tungod sa giingong “outstanding performance” sa kapulisan sa tibuok rehiyon sa ikaduhang quarter ning tuiga.
Sa pakighinabi sa Bombo radyo Malaybalay kang PMAJ. Joann G. Navarro, ang tigpamaba sa PRO-10, nakatala og dakong pag-ubos sa kinatibuk-ang insidente ug volume sa krimen sa Northern Mindanao. Partikular nga namatikdan ang 12 porsyento (12%) nga pagkunhod sa gitawag nga 8 focus crimes sa rehiyon.
Gipasabot ni Navarro nga kini nga kalamposan produkto sa walay puas nga operasyon ug dedikasyon sa mga kapulisan aron masiguro ang kahapsay ug kalinaw sa komunidad.
Gidugang sa opisyal nga nakakuha usab sila og 87.40% nga net satisfaction rating gikan sa usa ka independent third-party survey nga gipahigayon sa University of Science and Technology.
Dungan sa pag-ubos sa mga insidente sa krimen, misaka usab ang ilang Crime Solution Efficiency. Gipasabot nga ang tanang mga krimen nga natala daling gihatagan og saktong pokus ug dinalian nga aksyon sa kapulisan aron masulbad gilayon.
Gipahinumdoman usab sa opisyal ang publiko nga duha lamang ang nag-unang katungdanan sa kapulisan: ang pagpugong sa krimen—nga makita sa pagkunhod sa mga insidente sa palibot—ug ang dinalian nga pagsulbad niini kung ugaling aduna may mahitabo.