Gilauman nga magdala og dakong kontrobersiya sa FIFA World Cup ang nasud sa Iran sanglit makasulod kini sa finals gumikan sa nagpadayon nga tensyon ug krisis sa politika tali sa laing mga gamhanang nasud.
Sumala ni Football Coach Martin Laurel, bisan pa man kung usa ang Iran sa mga miyembro ug partisipanteng grupo sa maong prestihiyosong kompetisyon sa kalibutan, dili malikayan nga mabalaka ang kadaghanan tungod sa naglungtad nga panagbangi tali sa Iran, Estados Unidos (US), ug Israel.
Gipahayag ni Laurel nga ang pipila sa mga dula ug venue sa Iran gikatakda nga ipahigayon sa Mexico.
Apan ang dakong pangutana karon sa kadagkoan mao nga kung unsa matud pa ang mahitabo kung mo-qualify ang Iran sa sunod nga round.
Gipasabot usab sa football coach nga ang FIFA, nga maoy nagdumala sa World Cup, usa sa labing organisado nga sports association sa tibuok kalibutan, diin giingong mas organisado pa kini ug mas daghan og miyembro itandi sa United Nations (UN).
Tungod sa maong sitwasyon sa natad sa dula, dako ang posibilidad nga mamahimo kining taytayan alang sa maayong diplomatikong relasyon ug panaghigalaay tali sa Estados Unidos (US) ug Iran.
Apan sa pikas bahin, giila usab kini nga usa ka dako nga isyu kung ugaling dili tugutan sa gobyerno sa US ang Iran nga makadula sa sulod sa ilang nasud.
Gidugang pa nga kung madayon ang pagdula sa Iran sa Amerika, daghan usab ang mga Iranian fans nga mosulod aron mosaksi sa dula, hinungdan nga gikinahanglan gayod ang hugot nga pag-amping sa maong sitwasyon.