Nasikop sa mga awtoridad ang siyam ka mga langyaw ug duha ka Pilipino sa Mactan-Cebu International Airport human masakpi nga pagbitbit og salapi nga nagkantidad og kapin ₱441 milyon, pipila ka semana sa wala pa ang May 2025 midterm elections.
Matud ni Police Brigadier General Jean Fajardo, tigpamaba sa PNP, tumong unta sa grupo nga mosakay og pribadong eroplano padulong sa Manila alas 10:30 sa gabii, apan napugngan kini atol sa inspection sa ilang mga bagahe.
Ang mga suspetsado naglakip og 7 ka Chinese, 1 ka Indonesian, 1 ka Kazakhstani, ug 2 ka Pilipino.
Duha sa mga Chinese national nga adunay Interpol notice tungod sa kalapasan sa Article 308 sa Revised Penal Code kon kasong pagpangawat, nga adunay piyansa nga ₱10,000.
Ang salapi, nga giingong gisulod sa mga bag nga sports equipment gituohang gamiton sa eleksiyon,apan padayon pa kining ginabantayan na sa General Aviation terminal ug padayon ang imbestigasyon sa mga suspek alang sa posibleng pagpasaka og kaso.
Kabahin niini, gibutyag ni Jean Fajardo, ang tigpamaba sa Philippine National Police nga nakakustudiya na sa mga kapulisan ang mga suspetsado lakip ang kanditad nga nasakmit.