Gibutyag ni Atty. Mark Tolentino nga sayop ug sobra ang pamahayag ni kanhing Presidential Legal Counsel Salvador Panelo nga “palpak” ang legal team ni Senador Ronald “Bato” dela Rosa tungod sa paggamit sa certiorari nga adunay TRO imbes nga habeas corpus.
Matud ni Tolentino, ang writ of habeas corpus dili mahimong gamiton kon wala pay aktuwal nga pagdakop o detensyon, gumikan kini gigamit lamang aron susihon kung legal ba ang pagkapriso sa usa ka indibidwal.
Gipasabot niini nga kung wala pa’y napatuman nga arrest warrant, dili pa angay ang habeas corpus, samtang ang certiorari, prohibition, mandamus, ug injunctive relief gigamit aron mapugngan ang posibleng iligal o unconstitutional nga aksyon sa wala pa kini mahitabo.
Gipunting usab sa abogado nga lahi ang gamit sa matag legal remedy diin ang certiorari ug TRO para sa preventive action, samtang ang habeas corpus para sa aktuwal na nga detensyon.
Matod pa ni Tolentino, ang isyu kinahanglan tan-awon base sa hustong proseso, timing, hurisdiksiyon, ug constitutional basis, dili pinaagi sa pulitikanhong pagbatikos.