Patay ang usa ka 37-anyos nga lalaki human kini nalumos samtang nangisda sa sapa nga nahimutang sa Purok-5, Barangay San Nicolas, Don Carlos, Bukidnon niadtong Lunes sa hapon, May 18, 2026.
Base sa taho, nahitabo ang maong insidente pasado alas 5:50 sa hapon.
Dali dayong miresponde ang mga personahe sa Don Carlos Municipal Police Station sa pagpangulo ni Police Major Al-Nico R. Haman, Chief of Police, aron sutaon ug pamatud-an ang nadawat nga report.
Sa gihimong inisyal nga imbestigasyon sa kapulisan, nasayran nga nanagat ang biktima sa daplin sa sapa apan misalom kini sa mas lawom nga bahin aron makakuha pa og daghang isda, hinungdan sa pagkalumos niini.
Nakuha sa mga responders ang lawas sa biktima gikan sa tubig ug daling gikarga sa sakyanan sa punerarya. Pag-abot sa kapulisan sa dapit nahitaboan, giandam na ang patay’ng lawas aron daling madala sa Bukidnon Provincial Hospital sa Maramag alang sa medikal nga eksaminasyon.
Apan, sa pag-abot sa maong tambalanan, opisyal nga gideklara sa usa ka Medical Officer III nga wala na kini kinabuhi. Gidugang sa kapulisan nga walay nakitang timailhan sa foul play sa nahitaboan ug gituohan nga usa kini ka lunsay nga aksidente.