KIBAWE, BUKIDNON — Napalgan nga wala na’y kinabuhi sa tunga sa maisan ang usa ka 63-anyos nga mag-uuma sa Purok 7 Nabunturan, Barangay Pinamula, Kibawe, Bukidnon niadtong Agosto 21 sa mga alas 8:00 sa buntag.
Subay sa report ni Bukidnon Police Provincial Office (Buk PPO) Provincial Director PCOL Oliver Sotto Navales gikan sa Kibawe Municipal Police Station (MPS), nakit-an sa iyang pamilya ang biktima nga nag-hayang sa maisan samtang adunay samad nga gituohang gipusil sa ubos nga bahin sa iyang tuong ilok. Matud sa anak sa biktima, miadto ang iyang amahan sa ilang umahan sa hapon sa Agosto 20 aron magbaltay sa ilang maisan batok sa mga kawatan og mais, apan nabalaka sila dihang wala na kini makapauli pagkasunod buntag.
Gibutyag usab sa usa ka opisyal sa barangay nga nakadungog ang iyang pamilya og upat ka sunod-sunod nga boto sa armas niadtong gabiing wala makapauli ang biktima. Kasamtangang nakipag-coordinate ang Kibawe MPS sa Provincial Forensic Unit (PFU) sa Malaybalay City alang sa pagsusi sa crime scene, samtang padayon ang imbestigasyon aron mailhan ang suspek ug matino ang motibo sa maong pagpamatay.