Gipasabot sa City Environment and Natural Resources Office (City ENRO) sa dakbayan sa Malaybalay nga padayon ang ilang pagdumala ug pag-mentinar sa landfill aron masunod ang tanang requirements sa Environmental Compliance Certificate (ECC), ug giingon nga naningkamot sila nga matuman ang tanang kasabutan nga nakasaad niini.
Sa pakighinabi sa Bombo Radyo Malaybalay, gibutyag ni Dr. Jessie Suson, gipasiugda niini, nga dako kaayo og gasto ang operasyon sa solid waste management gumikan ang gobyerno pirmi mogasto para sa koleksyon sa basura, fuel, trabahante, ug pag-andam sa landfill area, bisan pa wala kini nagahatag og kita.
Tungod niini, gi-awhag niya ang mga residente sa Malaybalay alang sa zero waste management.
Gisugyot usab ang pagbalik sa mga praktis nga eco-friendly sama sa paggamit og eco-bags, baskets, ug reusable containers imbes plastik, ug ipatuman ang mga ordinansa batok sa sobra nga paggamit sa plastik.
Gipahibalo usab nga kaya pa sa kasamtangang landfill ang basura tungod kay 2 ka ektarya pa lamang ang nagamit gikan sa 8 ka ektarya nga yuta, apan giingon nga dili kini angay pagsalig-an kay dako gihapon ang gasto sa paglabay sa basura.
Gitapos ang mensahe sa pagpasiugda sa reduce, reuse, ug recycle isip pinakaimportante nga pamaagi sa pagdumala sa basura sa siyudad.